پاکستان تحریک انصاف نے کراچی کے بلدیاتی ڈھانچے سے وابستہ اپنے بتیس چیئرمینوں سے اٹھائیس ماہ بعد باضابطہ طور پر اظہارِ لاتعلقی کر دیا ہے یہ فیصلہ پی ٹی آئی کراچی کی قیادت راجہ اظہر کی جانب سے جاری کردہ ایک سرکاری خط کے ذریعے سامنے آیا جو میئر کراچی مرتضیٰ وہاب کو ارسال کیا گیا خط میں واضح طور پر کہا گیا ہے کہ تمام بتیس افراد سے پاکستان تحریک انصاف کا کوئی تعلق نہیں رہا وہ پارٹی پالیسی سے انحراف کر چکے ہیںلہٰذا انہیں ذاتی حیثیت میں رکن سمجھا جائے خط میں مزید ہدایت کی گئی کہ سرکاری خط و کتابت یا عوامی حلقوں میں ان افراد کا تعلق پاکستان تحریک انصاف سے نہ جوڑا جائے اور سٹی کاؤنسل میں انہیں آزاد ارکان تصور کیا جائے
یہ پیش رفت اس وقت سامنے آئی ہے جب سولہ جون کو ہونے والے بلدیاتی انتخابات کے نتیجے میں پاکستان پیپلز پارٹی میئر کراچی منتخب کرنے میں کامیاب ہوئی تھی اس وقت پی ٹی آئی کے کئی بلدیاتی نمائندے ووٹنگ کے عمل میں غیر فعال یا مختلف سیاسی اثرات کے زیرِ اثر قرار دیے جا رہے تھےاب تقریباً دو سال سے زائد عرصہ گزرنے کے بعد پارٹی نے اپنے مؤقف کو واضح کرتے ہوئے ایک باضابطہ اعلان کر دیا ہے۔
ذرائع کے مطابق پی ٹی آئی نے یہ قدم ہر قسم کی غلط فہمی سے محفوظ رہنے اور عوامی تاثر کو درست کرنے کے لیے اٹھایا ہےپارٹی قیادت کا کہنا ہے کہ چونکہ کچھ ارکان عرصے سے پارٹی کے مؤقف اور فیصلوں سے انحراف کر رہے تھے اس لیے اب انہیں آزاد حیثیت میں تسلیم کیا جا رہا ہے سیاسی تجزیہ کاروں کے مطابق یہ فیصلہ کراچی کی بلدیاتی سیاست میں نئی صف بندی کی نشاندہی کرتا ہے۔ میئر مرتضیٰ وہاب کی انتظامیہ کے ساتھ تعاون کرنے والے کئی سابق پی ٹی آئی نمائندے اب اپنی آزاد شناخت برقرار رکھ سکیں گے، جب کہ پارٹی تنظیمی سطح پر نظم و ضبط کی بحالی کی کوشش کر رہی ہے۔
دوسری جانب سوشل میڈیا پر عوامی ردعمل بھی سامنے آیا ہے جہاں بعض صارفین نے سوال اٹھایا کہ اگر یہ ارکان دو سال سے منحرف تھے تو پارٹی نے اتنی تاخیر کیوں کی جبکہ دیگر حلقے اسے اصولی سیاست کی سمت میں ایک مثبت قدم قرار دے رہے ہیں۔ یہ اعلان بلاشبہ کراچی کی بلدیاتی سیاست میں ایک نیا موڑ ثابت ہو سکتا ہے
